Revelation of John 18
Bapilon Kona Peng Ou Ni Kit Murum.
1Wote, ui ei kᵾn, na kandᵾr mel, anggelo ti, muⱡ kona wak ropa, mᵾi kona ila mana urum. Anggelo ei nga ronduⱡ mam ti mepa, elim nga kᵾng ila rᵾⱡang puⱡnga kᵾn, mᵾi kona ila rᵾⱡang mam ti ngurum. 2Wote, anggelo ni ndi, ronduⱡ ke nimba wi ropa nimba mel, “Kona peng ou Bapilon ni kit moⱡpa, uⱡ mbuⱡ nimba mana purum. Kona ni, muⱡnga kit mbᵾ kᵾn, uⱡ ⱡar mul kit mbᵾ kᵾn, kui kit elpa elpa mbᵾ kᵾn, kona ou ila peka rok muⱡing. 3Uⱡ ei, nambuⱡ emel, wamp mbᵾ ndi pora, kona peng ei, wapra amp mel randᵾk, nu wain ronduⱡ mat nok, wote mᵾi kona wu nuim mumuk mbᵾ ndi, kona peng ei wapra amp mel randᵾk. Kongun etᵾk, ku moni puⱡi ambulk etmin uⱡ ei ndi, uⱡ kit mbᵾ nga pipil kuⱡi nalk etmin,” nitim.4Wote, na pit mel, wi muⱡ ila ik ti ku ndi wi ropa, nimba mel, “Enim na nga wamp mbᵾ ye! Kona peng ou ei, wak rok kelik, ok ekit pᵾi! Enim wamp mbᵾ kona peng ei kᵾn, rᵾp rok molk, uⱡ kit mbᵾ iting uⱡ ei mon! 5Kona peng ou ei nga uⱡ kit mbᵾ moⱡpa, oⱡa omba wi muⱡ kona punum. Kona peng ou ei nga uⱡ kit mbᵾ, Got ndi, pilpa uⱡ mat etmba enim.
6Amp wapra ei enim kᵾn, uⱡ kit etᵾm ei mel mendpᵾⱡ, elim kᵾn punt rok ngui! Amp ei, elim kᵾn, punt rok ngᵾk kᵾn, mbuⱡ ila raⱡ etᵾk pendᵾk ngᵾi!! Amp ei, elim nga nu ming ila, enim ndi, punt rok, nu ronduⱡ pi, enim ngurum ei mel ngok, wote mbuⱡ ila nu ei, etᵾk ronduⱡ minal endᵾk raⱡ indᵾi!
7Amp wapra ei mel minal tepa, elim nga kᵾng orunga mepa oⱡa mba, ambuⱡpa paⱡpa murum. Elim nga uⱡ kit etᵾm ila, enim ndi, punt rok mindil mat minal ngangina kᵾn, ka rom ropa itangga. Amp wapra ei ndi, nimba mel, ‘Na amp nuim mumuk ei, wamp nuim mbᵾ nga nde pol ila mor. Na amp wiya ti mon! Mbun mindil mbᵾ, na kᵾn ui nawᵾrᵾm ama mon!’ nitim. 8Uⱡ ei nga, uⱡ kit elpa elpa mat, rumbᵾⱡ tenda ila elim kᵾn omba. Kui puⱡi omba, kona kump kun puⱡi tepa tangga kᵾn, wamp puⱡi ka etᵾk mindil nuing. Kona peng ou Bapilon ei, ndip ndi nomba pora ndumba. Ei nambuⱡ emel, Nuim Got ronduⱡ minal pi ei ndi, kona peng ou Bapilon ei, kit muⱡangga nitim ei mel etmba,” nitim.
9Mᵾi kona ila wu nuim mumuk mbᵾ ndi, amp wapra ei kᵾn, wapra rok uⱡ kit minal etᵾng mbᵾ ndi, kona peng ou ei, ndip nomba ikil oⱡa wangga kandᵾk kᵾn, ka rom rok muⱡing. 10Ei kᵾn, kona peng ou ei, mindil tᵾm uⱡ mbᵾ, wu nuim mumuk mbᵾ ndi kandᵾk, ruⱡ etᵾk molk, nᵾk mel, “Nim Bapilon kona peng mam peng ronduⱡ ni, ant tenda ila uⱡ kit mbᵾ nga, nim etᵾn ei nga, ndip nonum ei, ka nᵾk kont kuⱡing,” nᵾtᵾng.
11Mᵾi kona mbila wu mel pi mbᵾ ndi, kona peng ou ei, ndip nom uⱡ ei kandᵾk, mbun tᵾk ka iting. Ei nambuⱡ emel, en enim nga mel tetmᵾn mbᵾ, rarᵾp rok ting wamp ti mon! 12Rᵾng rarᵾp ruing ninmᵾn mbᵾ, ku gol na, silpa na, ku eng nui kai na, tᵾtpal ronduⱡ na, muⱡ mbal kurᵾmᵾⱡa eng nui kai na, muⱡ mbal kunt elpa elpa mbᵾ kᵾn, nde ronduⱡ mura rui mat kᵾn, kng elepant gu mbila, mim etmin mel mbᵾ kᵾn, nde mat ku moni ou ndupa purum mbᵾ kᵾn, bras na, ain na, ku mon rui mbᵾ kᵾn, mel mat kunda ku, nde kᵾng mura rui na, kupna na, paura mura kai rui na, kopung mura rui ronduⱡ kai na, kopung na, wain na, plawa na, wit na, kng kau na, sipsip na, kng os na, wil kar na, kongun kindmant wamp na, kont mormin wamp mbᵾ pora, rarᵾp rok ting kona ti mon!
14Wote, wu mel pi mbᵾ ndi, nᵾk mel, “Nim nga numan ei ndi, mel mat timp nᵾtᵾn mbᵾ, mba wei ai enim. Nim nga mel eng nui kai ku moni ou ndupa mba etᵾm mel mbᵾ, ndip nomba pora ndumba, wote kandkᵾn ti nᵾtᵾn,” nᵾtᵾng. 15Bapilon kona peng ila wu mel pi mbᵾ ndi, kongun etᵾk, ku moni ou nduk tᵾk etmin mbᵾ ndi, kona peng ei, ndip nangga kandᵾk, mundmong etᵾk kᵾn, ruⱡ etᵾk molk mbun mindil mbᵾ, tᵾk ka etᵾk kont kulk muⱡing. 16Wamp mbᵾ ndi, nᵾk mel, “Bapilon kona peng ei kandᵾk, kont enim ei, ka nᵾk muⱡing. Unt kona peng ei, wal pᵾki kurᵾmᵾⱡa eng nui kai na, muⱡ mbal kunt elpa elpa mat kᵾn, gol na, ku ronduⱡ mat kᵾn, tᵾtpal na mel ronduⱡ mat ndi, kona peng ei ou ndupa titim. Akup ndip nonum uⱡ ei nga kont enim. 17Bapilon kona peng ei, ant mong tenda ila mint, ku moni na mel ronduⱡ mbᵾ pora, ndip nurum,” nitim. Nu sip nga ambuⱡpa tᵾpa kun etᵾm rᵾp wu na, sip ila wu mat puk kona peng mat ila andᵾk etmin na, sip ila kongun tᵾk rapᵾndᵾk etmin wu na, num kuta ila andᵾk ku titmin wu mbᵾ pora, Bapilon kona peng ila ruⱡ etᵾk, kandᵾk muⱡing. 18Wote, wamp mbᵾ ndi, ndip nomba ikil oⱡa oⱡnga kandᵾk, nᵾk mel, “Bapilon kona peng mam ni, ndip nomba pora ndunᵾm ei ka! Wote, kona peng nam ti, Bapilon kona peng ei mel temba nda?” nᵾtᵾng. 19Wote, wamp nimbᵾ ndi, ui pakᵾk kont kulk, ka etᵾk, nᵾk mel, “Bapilon kona peng ei nga kont mam ti, enim nᵾk morung. Wu mel pi mbᵾ ndi, num kuta ila nu sip mek andᵾk, ku moni puⱡi kona peng ila tᵾk etmin wu mbᵾ ndi, en enim kont enim nᵾk morung. Ant mong tenda ila Bapilon kona peng ei, ndip nomba pora ndurum. 20Wote, enim Got nga muⱡ kona wamp na, painui wamp na, nombuⱡa rung wamp na mbᵾ, akup Bapilon kona peng ei, uⱡ enim ei nga ambulk palk muⱡᵾi! Nambuⱡ emel, Got ndi, kona peng ei nga uⱡ kit mat, enim kᵾn itim mbᵾ, kᵾmp tᵾpa punt ronum,” nᵾtᵾng.
21Ni kᵾn, ik ni nimba pora nduⱡnga kᵾn, wote anggelo ronduⱡ ti ndi, ku mam wit kᵾiya rok tᵾmin ni mel ti tᵾpa, num kuta ila ropa mana ndupa, nimba mel, “Ku mam ei, rop mana mundunt uⱡ ei mel etᵾk, Bapilon kona peng ronduⱡ rok mundangina, mba nu ila mana pangga kᵾn, wote wamp mbᵾ ndi, kᵾni nᵾkᵾning. 22Uⱡ ei nga, Bapilon kona peng ila ruk, gita na, pikul na, kowa pela ming ik ni na, kinan kai mat nᵾk etmin mbᵾ, kapⱡa pi nᵾpiling. Wamp mat kongun iting mbᵾ nga man ik tᵾk pora nduk etᵾng wamp mbᵾ kᵾn, ku mam wit kᵾiya rok etmin mel mbᵾ, Bapilon kona peng ila ruk tepa, ik nimba iti natᵾmba mon! 23Wote, lam kiya nomba rᵾⱡang mba etᵾm ei pora nitim. Wote, wu amp tᵾk amp wu nguk iting ik nᵾk etmin mbᵾ, kona peng ila rukrᵾng pi nᵾpiling. Unt wu mel pi mbᵾ ndi, wu nuim mel molk, kona peng ila wamp nga kuimp keta ila etᵾng. Wote nim ndi, ik kol rokᵾn wamp mbᵾ kᵾn, uⱡ kit mat itᵾn ku. 24Mᵾi kona mbila el puⱡa wamp mbᵾ ndi, wamp mat pora rok kondrung. Uⱡ mbᵾ nga puⱡ ei, Bapilon kona peng ila mint pitim. Bapilon kona peng ou ni pora nilinga, wote painui wu na, Got nga wamp mbᵾ nga mema oi ndurum,” nitim.
Copyright information for
MED